دوشنبه، دسامبر ۲۰۲۵ — رسانه‌های روسی به نقل از خبرگزاری «تاس» گزارش دادند که شامگاه ۲۴ دسامبر در منطقهٔ شمس‌الدین شاهین ولایت ختلان تاجیکستان، درگیری مسلحانه میان مرزبانان تاجیک و گروهی از مهاجمان که قصد نفوذ از افغانستان داشتند، رخ داد.
به گفتهٔ مقام‌های امنیتی تاجیکستان، سه مهاجم پس از مقاومت در برابر بازداشت کشته شدند و دو مرزبان تاجیک نیز در جریان تبادل آتش جان باختند. نیروهای امنیتی موفق شدند یک محمولهٔ بزرگ سلاح و تجهیزات نظامی شامل تفنگ‌های M16، تفنگچه‌های مجهز به صداخفه‌کن، نارنجک، مواد انفجاری و دستگاه‌های دید در شب را ضبط کنند.
این حادثه سومین حملهٔ مرزی از سمت افغانستان در طول یک ماه گذشته عنوان شده است. مقام‌های امنیتی تاجیکستان هشدار داده‌اند که افزایش چنین حملات نشان‌دهندهٔ تهدید جدی برای ثبات مرزی و امنیت منطقه است.
طالبان تاکنون در مورد این حادثه واکنشی نشان نداده‌اند. کارشناسان امنیتی می‌گویند که تداوم حملات مرزی می‌تواند روابط میان افغانستان و کشورهای آسیای مرکزی را تحت فشار قرار دهد و نیازمند همکاری‌های گسترده‌تر برای کنترل مرزهاست